سرینگر۔لیہہ شاہراہ سے برف ہٹانے کا کام اختتام پذیر:بارڈر روڑس آرگنائزیشن

15 اپریل 2019 (26 : 12 PM)   
(      )

عظمیِ نیوز ڈیسک

سرینگر/بارڈر روڑد آرگنائزیشن (بی آر او) نے سوموار کو کہا کہ سرینگر۔لیہہ شاہراہ سے برف ہٹانے کا کام ''پروجیکٹ وجایک'' کے تحت اختتام پذیر ہوا ہے۔ اس پروجیکٹ پر گذشتہ دو ماہ سے کام جاری تھا۔

بی آر او نے یہ بھی کہا کہ اب دراس سے زوجیلا پاس تک سڑک صاف کرنے کی کوششیں جاری ہیں جہاں حالیہ سردیوں میں بے حد برف جمع ہوئی تھی۔

''وجایک ''پروجیکٹ کے کمانڈر کرنل راجیو لوہانی نے ایک بیان میں کہا کہ یہ پروجیکٹ انتہائی کٹھن تھا لیکن انتھک کوششوں کے بعد اس کو اختتام پذیر کیا گیا ہے اور بی آر او اب اُس مقام تک پہنچ گئی ہے جس کو زیرو پوئینٹ کہا جاتا ہے اور جہاں تودے گر آنے کا خطرہ رہتا ہے۔

انہوں نے مزید کہا کہ اہلکار اور مشینری زوجیلا پاس پر برف ہٹانے کے کام میں کسی وقفے کے بغیر لگے ہیں۔

انہوں نے کہا کہ زوجیلا پاس پر برف کا ایک انچ ہٹانا بھی ایک چیلنج کی طرح ہے کیونکہ وہاں بے حد برف جمع ہے۔

سونہ مرگ ۔لیہ روڑ دسمبر سے اپریل کے وسط تک بند رہتا ہے۔ چونکہ اس بار شدید برفباری ہوئی تھی اس لئے زوجیلا پاس اور ارد گرد علاقے میں کم و بیش50فٹ تک برف جمع ہے۔

کرنل رجیو لوہانیا کے مطابق برف ہٹانے کے کام میں ابھی مزید کچھ دن لگ سکتے ہیں جس کے بعد ہی شاہراہ کو گاڑیوں کیلئے کھولنے کے بارے میں فیصلہ لیا جائے گا۔

 

 

تازہ ترین