تازہ ترین

جموں میں جعلی نوکریوں کا سیکنڈل منظر عام پر

خودساختہ آرمی کرنل گرفتار،کرائم برانچ متحرک

25 مئی 2019 (00 : 01 AM)   
(      )

نیو ڈسک
جموں //کرائم برانچ نے جموں میں ایک خودساختہ آرمی کرنل کوگرفتار کرلیاہے جو نوجوانوں کو روزگار کا جھانسہ دے کر لاکھوں روپے اینٹ رہاتھا۔کرائم برانچ نے یہ کارروائی مہندر کمار ولد انیک رام ساکن شامہ چک جموں کی طرف سے دی گئی تحریری شکایت پر کی ۔شکایت میں الزام عائد کیاگیاتھاکہ کلویندر سنگھ ولد کرنیل سنگھ ساکن دیہارن اکھنور روڈنزد مشری والا جو فوج سے معطل ہے ، نے خود کو آرمی کرنل بتلاکر بیروزگار نوجوانوں سے پیسے بٹورنے کا سلسلہ شروع کررکھاہے اور وہ ہر ایک نوجوان سے بھارتی فوج میں ملازمت کے جعلی حکمنامہ جاری کرکے دو سے پانچ لاکھ کے درمیان رقم وصول کررہاہے ۔ابتدامیں اس جعلی آرمی کرنل نے اپنادفتر پلوڑہ جموں میں کھولاجسے بعد میں مٹھی جموں میں منتقل کیاگیا اور ا ب اس کادفتر جانی پور میں بھی ہے ۔مذکورہ شخص آرمی کی وردی پہن کر نوجوانوں کو چونالگاتارہااوروہ وشال بھگت ساکن ڈریم سٹی، ساہل شرما ساکن جانی پور پریس والی گلی اور اپنے رشتہ داررکی چب کی مدد سے نوجوانوں میں فرضی آرڈر بھی بانٹتارہا۔شکایت کے مطابق جعلی آرمی افسر نے شکایت کنندہ کوباورچی کی نوکری دلانے کی یقین دہانی دلاکر اس سے پیسے وصول کئے اور پانچ ماہ سے زائد عرصہ تک اس کے گھر میں کام کروایا لیکن اس کے بدلے میں ایک بھی پیسہ نہیں دیا اور نہ ہی اس کا دیاہوا پیسہ بھی واپس کیا ۔اس شکایت پر کرائم برانچ کی طرف سے ابتدائی تحقیقات عمل میں لائی گئی جس دوران یہ پایاگیاکہ کلویندر سنگھ اپنے دیگر ساتھیوں کی مدد سے جعلسازی کے ذریعہ نوجوانوں سے رقم لیکر ان میں فرضی حکمنامہ تقسیم کررہاہے ۔اس پرکلویندر اوراس کے ساتھیوں کے خلاف ایف آئی آر زیر نمبر28/2019زیر دفعات 420, 467, 468, 471, 170, 171, 120آرپی سی کاکیس درج کرکے انسپکٹر ارون کوتوال اور انسپکٹر مشکور گیری کی قیادت وڈی وائی ایس پی کرائم برانچ جموں بھوشن کمار گنجو کی نگرانی میں ایک ٹیم تشکیل دی گئی جس نے اس کے کرایہ کے دفاتر پر چھاپے مار کر ملزم کلویندر سے وردی ،لیپ ٹاپ ، موبائل ، آرمی ریکروٹمنٹ کارڈوغیرہ برآمد کئے اوراسے اس کے ساتھیوں سمیت گرفتار کرلیاگیا ۔یہ گرفتاری ایس ایس پی کرائم برانچ مشتاق احمد کی ہدایت پر عمل میں آئی ۔اب ملزمان سے پوچھ تاچھ کی جارہی ہے۔